Na mañá do luns 19 de xuño no Salón de Actos, charla-encontro con Manuel Rodríguez Calviño sobre o cultivo e traballo tradicional do liño. Actividade feita en colaboración con Os Casares. Mil grazas!
Taller de BD e manga con Simón Blanco...
En colaboración co Departamento de Debuxo, o pasado venres 16 de xuño tivo lugar un taller de BD e manga para o alumnado de 1º ESO no Salón de Actos con Simón Blanco, debuxante e ilustrador e unha das mentes pensantes do Sindicato do Cómic de Ourense.
Nel, e a través de exemplos escollidos, o alumnado tivo a oportunidade de iniciarse en técnicas específicas da linguaxe da BD, grazas ao bo facer didáctico de Simón. Mil grazas compañeiro!
21.6.23
Lamañazo Rock: agradecemento!
Dende a organización do Lamañazo Rock, e unha vez pasada case unha semana da celebración do festival na nosa carballeira, queremos facer este comunicado de agradecemento:
1. En primeiro lugar á xente do Castañazo, alma mater deste novo Lamañazo, por motivarnos a comezar con este proxecto, e guiarnos e acompañarnos no proceso.
2. Á directiva do IES Lama das Quendas por facer (burocracia, documentos oficiais e demais) e, sobre todo, deixarnos facer, confiándonos equipamento e instalacións do centro con total liberdade.
3. Á Aula de Debuxo de 4º ESO e o seu profesor José Miguel López Gómez, polo traballazo facendo o logo e o cartaz do festival en tempo récord.
4. Ao profesorado e comunidade educativa, pola axuda e ánimos recibidos, a pesares de ter que faltar a algunhas das súas clases nos intensos días previos ao festival.
5. A todas as bandas coas que contactamos que non puideron vir, por facernos chegar o seu alento e interese para futuras posíbeis edicións.
6. A todas as bandas que puideron arranxar (GRELIMNS, FÁBRICA DE ESPEJOS, PLADÜR e SEARAS) para podermos desfrutar, de xeito completamente desinteresado, da súa maxia ao vivo e cun equipamento mínimo e subterráneo.
7. A Sonia da cafetería do centro e do Nº13, quen nos aconsellou e axudou á hora de organizar a cantina, e traballou no picoteo das bandas participantes.
8. A todas as entidades, asociacións e empresas que, dun xeito ou doutro, axudaron e colaboraron para que este festival collera forma: Protección Civil (seguridade e sabios consellos), Casa da Música de Chantada (equipo de son), Remate Gráfico (camisetas), Calambuco Distribuciones (equipamento para a cantina e bebidas), FICH (amplificadores e sabios consellos) e Asociación Luis Nieves (apoio e difusión mutuos).
9. A Miguel Piñeiro do xornal El Progreso, e Chema Núñez da emisora de radio COPE Lugo, por estar pendentes dende o principio de facerse eco deste festival máis aló destas terras do Asma.
10. E por último, mais non menos importante, a todas as persoas que sacaron un anaco do seu valioso tempo para achegarse na tarde do 15 de xuño e formar parte do que, agardamos, sexa o primeiro de moitos festivais. Ilusión e ganas de traballar non han faltar, de seguro!
Viva O Lamañazo!
20.6.23
Almorzo Saudábel para 4º ESO A!!!
Na mañá de onte luns 19 tivo lugar o almorzo saudábel da man da cafetería do centro para a aula gañadora do concurso Ovos de Pascua organizado por Biblioquendas, que foi 4º ESO A do titor José Luis Rodríguez Puente. Parabéns!!!
15.6.23
14.6.23
Malas novas no Lamañazo: TÍAM GZ caen do cartaz...
Malas novas: por mor da troca de día do Lamañazo TÍAM GZ non poderán acompañarnos este xoves por motivos laborais.
Pedimos desculpas ao público que contaba coa súa presenza nesta primeira edición do festival.
Agradecemos de corazón á banda toda a súa disposición e interese dende o comezo, e todas as voltas que deron para tentar acudir na nova data. Mais non foi posíbel.
Agardamos poder argallar algo con eles nun futuro próximo.
No seu lugar fará o seu debut como DJ para o gran público a nosa Laura, cun listado de cancións que non deixará a ninguén indiferente...
En breve publicaremos os novos horarios... vémonos o xoves!
8.6.23
7.6.23
Lamañazo Rock: cuarta banda confirmada!
Fábrica de Espejos é unha formación de synth pop altamente emocional con cadencia shoegaze.
6.6.23
Lamañazo Rock: terceira banda confirmada!
Pladür é un dúo de lo-fi punk. Fan cancións sinxelas e pegadizas sobre as cousas que lle pasan á Lúa e o Santi.
4.6.23
Lamañazo Rock: segunda banda confirmada!
A música tradicional virá da man das Searas nesta primeira edición do festival, formación cunha xa longa andaina polas festas e celebracións da bisbarra.
2.6.23
Lamañazo Rock: primeira banda confirmada!
TIAM Gz é un grupo de rap galego formado en Chantada no ano 2018 por Iago Suárez «Iagueiro», Álex Varela «Alessov», Brais Vázquez «Torozas» e Matías Zelarayán «Mr. Mati». Os integrantes do grupo definen a súa música como «rap feito na casa» a través do cal, ademais de transmitir as súas ideas persoais, inclúen temática político-social que se encadraría no galeguismo combativo. Afirman que o rap é o xénero musical que máis os representa porque outorga máis liberdade de expresión a quen canta e convida á reflexión e ao pensamento a quen escoita.
