Biblioquendas

21.9.26

A lebre mecánica, Ledicia Costas

As cousas entre Nana e Corvo ultimamente non van nada ben. Conseguiran construír un mundo onde compartían todo: películas, música, manga, videoxogos... Non querían separarse nunca. Mais iso era antes. Agora Corvo desaparece durante horas e non conta onde vai. Cando Nana lle pregunta que lle pasa, enfádase. No seu grupo de amigos ninguén comprende que lle sucede. Desde que empezou a ir en serio coas apostas semella outro. O que antes era pura diversión converteuse nun pesadelo. Case sen decatarse, Corvo acaba metido nunha rede de problemas da que semella imposible saír.

As malas ideas, María Solar

Elías é un afamado director de produción de series, cuxa traxectoria se ve repentinamente desprestixiada cando o seu equipo de rodaxe se planta nunha absurda folga. A crise laboral coincide coa morte do pai en Ferrol e vese na obriga de deixar o traballo e volver á súa terra natal. Alí descubrirá asombrado que o seu pai fabricaba un artefacto explosivo no faiado; coñecerá a Merceditas, unha rabuda octoxenaria; a Irene, unha atractiva e enigmática veciña; a Ana, unha muller migrante sen papeis, e aos membros furiosos dunha rondalla que o perseguen. Todo se converte nun delirio, mentres o seu mundo laboral e persoal cae no caos. E Merceditas parece ter as claves do que sucede.

O país invisible. A epopea atlántica da diáspora galega, Arturo Lezcano

Guiado pola desmesura de vinte anos de viaxes e mudanzas, entrevistas e lecturas, armado das ferramentas do reporteirismo minucioso e adobiado polo talento literario, Arturo Lezcano asina unha obra monumental que se le como unha fábula, un libro de viaxes, unha elexía e unha crónica en primeira persoa. Ou coma un Mil e unha noites das Américas contada a través dunha galería de personaxes galegos engaiolantes: Alfonso Graña, o rei dos xíbaros; Pepe la Muerte, lugartenente de Lucky Luciano; o Manolito de carne e óso de Mafalda; Antonio Soto, o heroe anarquista da Patagonia, e outras duascentas historias de mulleres e homes anónimos ―os obreiros que construíron a Canle de Panamá, os inventores da noite de Copacabana e tantos máis― que crearon unha nova vida (e un país invisible) da outra beira do océano.

Manuel Jorge. Obras pictóricas 1958-2017

Catálogo da retrospectiva celebrada en Galicia no ano 2018. Textos en galego e castelán. Con reproducións da obra, fotografías dos eventos relacionados coa mostra relacionados e unha ampla entrevista co autor.

Folión de Carros. Patrimonio Cultural de Chantada

O libro aborda o Folión de Carros de finais do século XIX e boa parte do século XX a través das referencias que aparecen na prensa histórica local e rexional. Na súas páxinas recompílanse unha boa parte dos programas e crónicas das festas de Chantada, nos anos que se celebrou Folión de Carros, desde 1877 a 1964. Pódense encontrar, por tanto, como eran as festas daquela, nomes das persoas que formaban as comisións de festa, números e celebracións que nin sequera imaxinamos puideran existir en Chantada, etc.

A explotación de arxila e a súa transformación nas Terras do Condado de Pallares, Mª Ángeles Verea Castelo

Estuda a historia da industria das teleras, a extracción de arxila e a súa transformación na zona do Condado de Pallares desde o século XIX, con especial atención a lugares como o Alto do San Roque en Taboada.

9.9.26

Comezamos novo curso en Biblioquendas!!!

Benvidas e benvidos!!!

6.7.26

FELIZ VERÁN DE BOAS LECTURAS!!!

3.6.26

Lamañazo Rock #4: colaboran...

2.6.26

Lamañazo Rock #4: horarios...

28.5.26

Lamañazo Rock 2026

19.5.26

Desvelamos cartaz do Lamañazo deste 2026!!!

13.5.26

Begoña Caamaño, Letras Galegas 2026

O meu Nome é Morgana.
Morgana de Cornualles. Morgana de Tintaxel. Morgana de Ávalon. Morgana de Camelot.
Morgana, a filla de Garlois. A irmá do rei. A sabia. A druída. A meiga. A fada. A bruxa. A puta.
Chamádeme como queirades. Tanto ten. Son todas e non son ningunha, que en cada unha desas Morganas, e de tantas outras como poidades imaxinar, hai parte da miña esencia, pero eu son máis, moito máis do que a suma ou o seu conxunto.
Eu son Morgana e esta é a miña historia. Contada por min mesma, coa miña voz. A única historia en que me vexo e en que me recoñezo. Por máis que haxa quen lembre doutro modo os feitos.

12.5.26

Comezamos coa Semana das Letras...

O alumnado de 1° e 2° ESO leu a obra de Héctor Cajaraville Os Metrosiderais, ambientada na Coruña.

O alumnado participou nun roteiro literario guiado polo autor pola mañá, visitando os espazos exteriores da novela. Entre outros: a Praia das Amorosas, a igrexa de San José ou a comisaría da Policía Local de Montealto, onde puideron ver o metrosideo de máis de 400 anos, unha das Árbores Senlleiras de Galicia e nominada a Árbore do Ano.

Así mesmo, tiveron ocasión de entrar na Casa das Ciencias e no Planetario, espazos interiores presentes na obra. Neste último, divisaron o Triángulo do Verán, unha constelación presente na novela.

E por se fora pouco, na materia de Educación Plástica realizaron un proxecto sobre esta obra que consistiu en imaxinar un dos espazos e ilustralo.

Con esta actividade comezamos no IES Lama das Quendas a celebración da Semana das Letras.

7.5.26

Argallando xa na nova edición do Lamañazo...

Subscribirse a: Publicacións (Atom)