10:58
Gañadora ex aequo do VIII Premio Meiga Moira de Literatura Infantil e Xuvenil (2018). As voces da auga destaca pola calidade de lingua empregada, a orixinalidade da proposta e o intenso labor de recreación dunha sociedade xeográfica e culturalmente tan distante como a chinesa.
Baía Edicións. 2018
A autora recrea as vidas de varios personaxes que habitan unha aldea da China. O ritmo da novela semella intencionalmente lento, coma as augas do río Ligiang. Respírase unha calor húmida no ambiente que non consegue aliviar a suave brisa que, por veces, sopra sobre os arrozais. Os personaxes tentan liberarse dun pasado ao que xa, nin eles nin o propio país pertencen. O futuro tampouco semella esperanzador, mais loitan contra a adversidade coa determinación dos xustos. Wei Su é, quizais, o máis entrañable, vive atado á tradición pola súa orixe, e xa ancián oponse aos poderosos que carecen de escrúpulos para tomar medidas que producen beneficios económicos a custa de danar a saúde das persoas.
O libro reflicte ademais a terrible discriminación da muller na China: as antigas concubina; as nenas «prohibidas» asasinadas ou abandonadas (algunhas na auga como o Moisés bíblico); pero, tamén as activistas políticas como Lu Mai, abandonadas e ignoradas polo rexime de Mao.
A autora lévanos a un ambiente exótico nunha aldea chinesa na estación dos monzóns, á sombra de ailantos e casuarinas, ao curso do río Lijiang. Introdúcenos nas vidas de Li, o can Rabiño, o sabio e bondadoso Wei Su ,e o malvado Thep. Unha vez máis, «o Ying e o Yang».
0 comentarios:
Publicar un comentario