Sesión de animación lectora con Eva Tato

O pasado luns tivemos unha sesión de animación á lectura para 1º de ESO e outra para 2º de ESO. Foron impartidas por Eva Tato grazas ao patrocinio de Loqueleo-Santillana que nola achegou ao Lama das Quendas.( Grazas, María!)

A rapazada fíxonos a súa valoración da actividade e nós aproveitamos para poñer algunhas das súas opinións neste blog.

Afirma Omar que «a animadora chegou moi ben ao alumnado».E Martín engade «pasámolo moi ben porque Eva contounos historias que nos encantaban.Todos prestamos moita atención porque xesticulaba moito e mudaba de tono de voz».Lucía recalca que lle gustaron «os diferentes tonos de voz que empregou. Repetiría a experiencia xa que foi moi boa». César conta que o pasou moi ben nesa hora «porque Eva tivo sempre unha actitude humorística e entendeuse perfectamente todo o que nos quería transmitir». Eloi tivo que reflexionar porque ao principio quedou "descolocado" e, xa pola tarde, chegou á conclusión de que «pensándoo ben sei que a animadora conseguiu contar historias interesantes e divertidas que estaban noutros libros». (Pode que se anime a lelos!).Beatriz quedou feliz porque Eva «transmitiunos amor cara os libros. Gustoume moito como se expresou, como nos fixo entender as historias para dar, ao final, coa historia de La chica que patina y el tonto que la quiere que nós lemos. Fíxome pensar que en realidade , os libros son fermosos». Polo que se refire ao contado polo alumnado de 2º, remata Xabier coa manifestación coincidente dos asistentes «Déunos a todos moita pena que acabase a sesión».

Os de 1º contan o vivido practicamente de igual maneira e concordando co que xa escribimos que manifestaron os de 2º de ESO. Aínda así sinalaremos que Ainhoa estivo moi a gusto na sesión e «Eva sacoume un sorriso que me quedou posto todo o día. Transmitiume a súa enerxía, fixo actividades divertidas, contou historias moi interesantes...». E Lucía escribe «destaco a súa forma interactiva de contarnos os contos e xogar ao tempo». Finalmente , Carlos pon en palabras o sentimento xeral «foi unha actividade fantástica, agardo que se repita».

Esta foi a sensación coa que quedaron os alumnos. A do profesorado non é  distinta. Nós , ademais de divertida, dinámica, participativa... consideramos a actividade estupenda para tentar que a rapazada lea máis e desfrute coa lectura por iso facemos este tipo de propostas .

E quen non asistiu preguntarase, logo que fixo Eva Tato? Pois resúmeo Laura:
«foi unha visita ben interesante porque foi distinta a outras vividas. Ela explicounos de maneira teatralizada e con distintas actividades o que era o amor e os diferentes tipos de amor mediante unha historia que incluía outras nas que relataba o que lles sucedía a uns personaxes que ben se amaban a si mesmos ( Narciso que desprezou o amor da ninfa Eco),ben amaban o diñeiro ( problemas entre Calisto e Melibea) ou amaban a quen tiñan ao arredor ( Pedro tiene cuatro padres/ La chica que patina y el tonto que la quiere). Isto pareceume moi divertido e adaptado á nosa idade  ».

Xa percibiredes que nos quedaron boas sensacións, bo sabor de boca. Pero ademais ,saímos cunha mensaxe de amor polos libros  nos petos e coa intención de ler máis e de tentar ver as historias coa nosa mirada particular. E isto grazas a que Eva nos regalou a cada un de nós, coa  súa mirada, unha miguiña do seu enorme amor polos libros. Non, non vos preocupedes que aínda lle quedou para ela.Grazas Eva!!

Oxalá a nosa rapazada coide , para que medre, ese cariño polos libros e a lectura e sempre que poida, espalle polo mundo o fermoso vicio de ler .